周三里奧乒乓球女單決賽中國內訌，丁寧以盤數4:3險勝李曉霞，四年前嘅冤屈終於釋懷，鐵血女將都頂唔順爆喊。丁寧呢啲係開心嘅眼淚，那邊廂日本嘅福原愛就陰公豬，喺四強食蛋輸波，再喺季軍戰輸埋，征奧咁多次都拎唔到個人獎牌，已經27歲嘅佢唔傷心就假。
四年前冤枉失金
自88年加入兵球項目起，中國一直贏晒咁多屆女單金牌，今屆都唔例外。2012年乒乓球女單決賽又係中國內訌丁寧對李曉霞，本來佢兩個係勢均力敵，但當時裁判頻頻判丁寧踎低發球犯規兼罰分，變咗一場一面倒決賽，丁寧最後局數1:4慘敗屈居亞軍。
到咗周三再喺奧運決賽碰頭，冇咗裁判搞搞震，大家盡情發揮下，局數互有領先，先贏一局嘅丁寧一度落後2:3，但最後兩局回勇，扳平後到關鍵第七局一度領先到10:5，緊張情況下被李曉霞追番兩分，丁寧及時冷靜落嚟叫個暫停，雖然冇教練教路，但唞一唞果然唔同晒，即刻拎埋最後一分，繼世盃同世錦賽奪冠後，贏埋奧運金牌，成為中國歷來第五位完成乒球大滿貫嘅女將。
四年前覺得被屈冇咗個金牌，賽後失聲痛哭；之後佢再經歷起跌，到今次可以彌補四年前嘅遺憾，丁寧雙手大叫再跪地爆喊，賽後話：「今場決賽對我哋都好唔容易，自己拎咁多次冠軍，冇一次會喺賽後同李曉霞擁抱，一切盡在不言中。」
福原愛冇牌都喊
李曉霞喺今屆女單16強淘汰香港代表李皓晴，再喺周三較早時間上演嘅四強，將日本球手福原愛淘汰，嗰場波福原愛兵敗如山倒輸0:4，打到喊咁口，最慘係佢之後喺季軍戰1:4不敵北韓嘅金宋依，由04年到今屆第四次征奧，始終都係贏唔到一面奧運個人項目獎牌，下屆奧運雖然喺自己地頭東京上演，但到時福原愛都已經近32歲，參唔參加都成問題，福原喺季軍戰賽後含住眼淚話：「多謝球迷支持，希望大家喺團體賽會支持日本。」
