英聯盃次圈前日抽籤，多支英超球隊加入戰團，好似利物浦就抽中作客英冠嘅伯頓，算係中籤啦。伯頓周三晚喺首戰同貝利法定時間賽和1:1，最後加時贏3:2晉級。另一支英超勁旅車路士抽中對卡迪夫城或者布里斯托城，愛華頓就抽到上籤，會喺主場對英乙嘅伊奧維，至於史雲斯就作客英甲嘅彼德堡。次圈嘅比賽會喺今個月22號嗰個星期嘅周中舉行。
喺前日嘅首圈，都有支為人熟悉嘅球隊被踢出局，就係今季降落英冠嘅阿士東維拉，佢哋作客英乙嘅盧頓，牌面高兩班，仲靠佐敦阿休入波開紀錄，點知之後連失三球，包括中堅奧哥尼擺烏龍，結果以1:3輸波出局。家陣維拉連英乙都輸得，中國班主夏建統仲話要喺五年內帶領維拉成為全球最受歡迎球會，真係唔知佢飲大咗定大想頭！