中環蘭桂坊經典品牌，八十年代老蘭地標Club 97酒吧（97吧），原來已經悄悄準備結業。舖位業主中環鏞記酒家二少甘琨禮將舖位重新斬件出租，最近以30萬元租出一部份。
97吧係最早喺蘭桂坊開設嘅酒吧，約於1982年開業，名稱大概都估到係同97回歸有關。當年承租中環蘭桂坊8至11號昌隆商業大廈地下、高層地下同1樓三層，一直租用至今。
由於成名早，97吧曾經大受夜蒲人士歡迎，亦係名人蒲點之一。不過，之後蘭桂坊越嚟越多酒吧開，競爭激烈，名氣已經大不如前。
97吧更加喺2006年俾經營山頂太平山餐廳嘅饕餮集團收購，97吧個品牌曾經喺幾年前消失，直到近三年先開番Club 97同Post 97兩間酒吧。
最近饕餮集團打算放棄租用昌隆商業大廈月租大約56萬嘅舖位，又因消費市道差，大舖位難租，業主將地下1號舖連高層地下及1樓以30萬租畀另一間餐飲集團，剩得地下2號舖以16萬放租，即係就算租得晒，租金都會跌10萬。據知，Post 97已經關門，Club 97會做到月尾。