中國男籃自京奧分組賽贏德國後，已經接近八年未喺奧運贏波，周三里奧A組分組賽對委內瑞拉，原本都有機會打開勝門，委國後衞葛斯都夠晒中國朋友，呢位前湖人球星拜恩（Kobe Bryant）嘅表弟，全場10射1中，但中國唔爭氣，俾委國拎到12個進攻籃板，加上最後階段失誤，最後以68:72輸波，已經2,917日未喺奧運贏波。中國三連敗後出線八強機會渺茫，國內唔少網民去到國手微博留言批評，包括後衞郭艾倫，呢位遼寧球員竟然沉唔住氣同網友互鬧，仲叫網友咁叻就入國家隊。
美國反勝澳洲
同日美國鬥澳洲就贏得有驚無險，美國半場落後49:54，係04奧運準決賽對阿根廷後另一次半場落後，好在美國後勁凌厲，最終以98:88反勝，安東尼（Carmelo Anthony）攻入31分，壓過勒邦占士（Lebron James）成為美國男籃奧運得分王。