好多品牌鍾意搵明星做代言人，德永佳（321）行政總裁丁傑忠（Simon）最近為此好頭痕。事關德永佳旗下有零售服裝品牌Baleno，以往Baleno呢個休閒時裝品牌，搵過劉德華、海綿大哥做代言人，𠵱家就物色緊新嘅人選。
雖然Simon暫時冇乜心水，但就希望搵個受內地人歡迎嘅人，可惜內地靚仔明星唔多，叫得出名嘅，只得海綿大哥；Simon又慨嘆，華仔雖然夠靚仔，但睇番年紀，好似唔係咁啱佢哋品牌形象。
咁不如考慮韓星喇，一提韓星，佢就自爆瘀事。佢話，曾經有朋友畀一張韓星相佢睇，佢望完覺得幾靚女，點知相中人原來係男藝人，思前想後，佢都係想搵番中港明星。