8月份多個全新樓盤排隊登場，可以說是琳琅滿目，發展商亦開始施快刀斬亂麻。老樓感覺到去到呢個階段，買家要睇清楚新盤是否適合自己需要，不要羊群心理，被新盤迷魂大法所蒙蔽。
自一手銷售條例生效之後，發展商投石問路，秩序已經修正了許多，可能呢個行業好喜歡挑戰條例，抑或是試試條例的底線，往往走鋼綫賣樓。除了銷監局和消委會建議最好前一天抽籤，但仍然有即日抽籤安排賣樓次序之外，招標又出價單、銷安不會賣晒已公佈價單內的單位，依然限量發售，製造成每次都有賣出九成或以上的銷售數字，令未買或公眾人士誤以為好賣。
近兩個月老樓無論在茶餐廳抑或行山，都聽到茶客或路人談及樓市。最近一次以私人身份睇示範單位時，見到兩名經紀同一名準買家一同等𨋢，高談闊論過去多個月睇示範單位的經驗，看來樓市真是被發展商的賣樓手法引到很多市民睇樓，與一班代理死使夾計做旺個市。
其實旺淡與樓市願景有莫大的關係，大眾看到樓市會跌當然會縮一縮；但見到人人都搶時，避免執輸亦加入搶貨行列，在這10多年時間經常出現類似的高低潮。正如跌市時你有勇氣和本錢，便可以執到平貨，但羊群搶貨的時候便是要忍手時刻。這次高潮市又製造熾熱氣氛，盲搶時代又重演了。
劉兆昌
資深地產傳媒人
http://www.HKLau.com
本欄逢周五刊出