唔少立法會議員因為政見唔同，喺立法會鬧交扯火時，不時都出現「小學雞」場面。近日一班立法會候選人就應「毛記電視」邀請，全部着番校服回到校園時，喺一間小學課室出席選舉論壇。雖然論壇仲未出街，內容屬於「高度機密」，但唔少小學雞「學生」近日都搶先上載自己個學生look上fb，唔知邊個先係大家心目中嘅校花同校草？
參選港島區嘅公民黨陳淑莊話，今次要多謝毛記電視同林日曦，令佢可以一圓着旗袍校裙心願。工黨何秀蘭就話，做小學雞梗係要搞笑，而搞笑中又要出到嚴肅訊息，覺得好高難度。
本身係理工大學講師嘅工黨「比卡超雄」張超雄，罕見留鬚小學生造型引來唔少網民熱議。有人話佢有「吳耀漢feel」，亦有人話佢「訓導主任扮學生放蛇」，超雄亦相當搞笑，喺fb自嘲話有「風紀」同佢講：「同學，校規講明唔畀留鬚喎！」
亂髮林作任形象指導
近日喺新東拍住超雄組成聯盟參選嘅公民黨楊岳橋，就好照顧呢位同學，喺錄影小息時，帶埋熊仔餅同佢「分餅仔」，但岳少明顯係調皮同學，休息時竟然瀡樓梯。向來高人一等嘅林卓廷，就要屈膝同黃慘盈合照，而東方昇就要「離地」先合照。
話得係小學雞選舉論壇，花生位當然唔少得，除咗搵頭髮亂了嘅林作現身為同學做形象指導，據知復出參選新東嘅鄭家富喺辯論環節，狂質同區參選嘅「哪吒」方國珊係「政壇變色龍」，方國珊「還拖」攞出一張鄭家富霸佔立法會停車場車位嘅舊剪報，之後兩人先係叠聲，繼而有人出手掃跌咗哪吒份剪報，令同班同學食花生都食到滯。各區其他參選名單，請參閱本報立會選戰網站 http://hk.apple.nextmedia.com/legco2016/region 。
李八方
mailto:[email protected]