上月內地暴雨令垃圾湧港，香港海灘突變垃圾灘。睇唔過眼唔只香港人，仲有喺沖繩居住嘅鈴木博將（HIROMASA SUZUKI），佢睇到新聞後上周五特登飛嚟香港執垃圾。佢話自己過去3年獨自清理6.6噸海洋垃圾，一個人力量雖然好細，但只要踏出一步，就為身邊嘅人帶嚟希望。
31歲嘅鈴木博將係日本環保組織Open Earth成員，佢經常喺沖繩海灘執垃圾，佢話日本西岸海灘同香港好似，經常有垃圾從中國漂嚟，每次執靚海灘後，第二日垃圾又湧嚟，過去3年佢執咗6.6噸垃圾。鈴木先生上禮拜五決定飛嚟香港，打算清潔大嶼山南部同屯門黃金海岸海灘。
下月到內蒙植樹
由於鈴木先生唔識廣東話，所以最初佢獨自執垃圾，後來一位細路同爸爸主動幫手撈垃圾，佢就用新學嘅廣東話講多謝，慢慢越嚟越多人幫手。
鈴木先生同八方講：「只要你肯去做，奇蹟就會出現。」鈴木先生今日就會離開香港，下月再出發去內蒙古植樹，繼續保護地球環境。