前排講完考慮選特首之後又靜番嘅財政司司長曾俊華（圖），噚日去咗個創科論壇，順便睇吓iPhone專用嘅八達通讀卡器，聽完一輪介紹之後，有職員問鬍鬚曾用邊款電話，佢就話，「我用HTC嘅！」換言之個讀卡器，鬍鬚曾用唔着喇，但唔知佢部智能電話有冇中招遇上晶片漏洞呢？
鬍鬚曾昨日現身嘅活動主題係電子支付，做主禮嘉賓嘅佢雖則唔係留咗好耐，但起碼畀足誠意，睇咗一輪示範兼致埋辭先閃人。致辭嗰啲行貨嘢就無謂多講啦，重點係大家繼續追問鬍鬚曾，準備好選特首未？佢兩次被問到時都只笑不語！選舉唔講，八方就問吓佢會唔會考慮吓換過部新電話，事關好多Android機都中咗晶片漏洞，不過鬍鬚曾繼續沉默，揮手走人。