近期本報體育版同馬版合併，希望大家留意體育之餘，都留意多啲賽馬消息。講起小弟賭馬經驗，初中時間已經偷偷入投注站落注，當年嘅馬王好似及時而出、翠河、奔騰等等，仲係記憶猶新，不過小弟最欣賞金蘋果，本身係配售馬，不過由低班贏起，慢慢爬上頂班，馬兒生涯贏夠10W，呢啲先係輸在起跑線，贏在終點前。
講開賽馬，馬會繙譯外國騎師都好有心思，通常用啲中國人常見姓氏行頭，再配以老利嘅字樣，個人覺得馬會繙譯已故騎師魏德禮最好，魏字喺香港都係常見姓，德禮亦夠晒斯文大方，真係唔似繙譯，另外馬佳善、杜利萊都係譯得唔錯嘅騎師。
相反馬會繙譯足球員名就有啲騎呢，幾年前巴西出過位死球專家，一般都叫P祖連奴，不過馬會譯做祖連奴比南布肯奴，又長又難記，好彩P祖喺13年已經退休，慳番好多油墨。阿仙奴今季簽保頓（中）中堅，英文叫Rob Holding，馬會起初譯做洛奧特，引起唔少人批評，好彩佢哋從善如流，之後改番洛賀丁，當堂啱晒發音之餘，仲幾有意思添，賀丁賀丁，恭賀添丁。
20歲嘅洛賀丁仲未添丁，不過新一季要肩負重責，因為兵工廠有梅迪薩卡同基比爾包列斯達受傷，哥斯尼亦剛傷癒。下周日場揭幕戰鬥利物浦，以至嚟緊英超季初比賽，都要靠賀丁。以佢季初表現，都見得吓人，對瓜達拉哈拉一戰仲有波入，希望人生首場英超唔好怯場啦！文：牽牛