里約奧運喺周二舉行女子雙人10米台決賽，不過所有觀眾嘅焦點應該都唔係邊一對組合拎到冠軍，而係「典解」池水會一夜之間由藍色變成綠色？
作為里約奧運嘅場館之一，瑪莉亞蓮克水上運動中心會舉辦跳水、韻律泳同水球比賽。呢個場館喺周一舉行男子10米雙人台嗰陣都好地地，點知周二就突然出事，舉行跳水賽事個水池啲水突然變咗色，啲「綠水」望落勁似有毒，真係好得人驚。
官方澄清水質冇問題
英國跳水神童戴利周二都有到場支持英國同胞，當佢見到啲池水變晒綠色，都忍唔住上載張相去twitter，仲問：「到底發生乜事？」有網民就估計，可能係池水入面唔夠氯氣，令浮藻得以滋生，亦有網民講笑話，可能係史力加喺個池度浸咗一晚，搞到個身啲綠色甩晒落啲水度喎；更加有網民賴戴利，話佢喺周一夥拍葛菲路贏得銅牌後開心到跌咗落水，搞到池水變色。里奧官方事後就喺twitter解畫，話水質經過測試，唔會危害運動員嘅健康，而佢哋亦都調查緊池水變綠嘅原因。
女子雙人10米台跳水嘅英國選手歌治，賽後就話自己比賽咗咁耐，都未見過啲池水會係咁嘅顏色，仲話喺熱身嗰陣已經注意到池水唔同咗色，點知喺比賽期間就越變越綠。不過，歌治就話池水係乜顏色都唔會影響佢表現，佢最終同拍檔陶遜以319.44分得第五。
五金陳若琳考慮退役
至於中國就延續強勢，陳若琳/劉蕙瑕呢對組合交出精采嘅表現，最終以354.00分稱后，為夢之隊贏得今屆奧運第三金。23歲嘅「三朝元老」陳若琳亦贏得個人第五面奧運金牌，同師姐吳敏霞並列為贏得最多奧運金牌嘅跳水女將。陳若琳賽後仲眼濕濕咁話打算退役：「今次好可能係我最後一場比賽，所以我好想以完美嘅表現完成呢場比賽。」
