每季英超開波前，賽會都會搞個領隊會議，邀請每隊主帥出席，目的除咗等大家認識吓、交流吓之外，最緊要等每個領隊都清楚英超嘅賽例。喺禮拜二，車路士新帥干地、利物浦領隊高路普同李斯特城嘅雲尼亞里都喺倫敦開會，但雙曼主帥哥迪奧拿同摩連奴就冇到。
呢班英超領隊都好尊重場合，個個都着恤衫長褲到場，有啲仲着埋西裝打呔，好似雲尼亞里就執得最正，一對皮鞋擦到立立令，打咗條花領帶，真係搶晒鏡，睇相都覺得佢風騷。又難怪嘅，佢係上季冠軍，仲同李城傾掂數續約。
年薪3,000萬簽四年
喺噚日李城宣佈同64歲嘅雲尼亞里續約四年，據報佢份新約嘅年薪有300萬鎊（約3,043萬港元）。雲尼亞里話：「我同李城班主傾到球會嘅遠景嗰陣，我就知我會喺呢度留好耐。由職員到老闆，由球員到球迷，成間球會都充滿朝氣，我好開心同自豪繼續做其中嘅一分子。」不過，據報李城翼鋒馬列斯有機會去車路士，相信雲尼亞里續完約之後要落足嘴頭𠱁馬列斯留隊。
講番個領隊會先，高路普着牛仔褲嚟，加埋個背囊，畀人感覺年輕有活力，至於干地都着得唔錯嘅，但拎住個白色膠袋，好似買完餸咁，就減晒分嘞！屈福特嘅馬沙利就超似土豪，着西裝同戴超，仲孭住個名牌斜孭袋。至於阿仙奴領隊雲格就冇親自到場，派副手保特嚟，雲格去咗呢啲會差唔多成20年，相信佢都去到悶。不過，搵極都冇曼城領隊哥迪奧拿同曼聯嘅摩連奴，佢哋做乜咁曳唔開會！唔通佢哋有特權？唔係，原來為咗方便英格蘭北方嘅領隊，英超喺曼徹斯特都搞咗個領隊會，相信哥、摩兩帥去咗嗰個。