台灣人嘅法律觀念同香港唔多同，一位上午宣誓就職（駐新加坡經貿代表）嘅「外交官」，晚上就因為飲酒後駕駛（酒駕）被台北警察捉個正着嘅72歲長者江春男，最初當作若無其事，聲言8月8日就往新加坡履新，但檢控官決定緩起訴一年，江春男得唔到政府嘅就職許可，於是滯留台灣唔知到幾時，成為政壇笑話。高官酒後駕駛，被捕後酒測超標，證據確鑿，江春男想話講幾句深感抱歉就算，有種嘅，應第一時間辭職至係（按：江卒於8月9日請辭）。香港人現在多數好守法，每次飯局中，不論男女，如自己駕車，頂多飲紅酒一兩啖，或索性飲茶水，真係愛飲嘅，唔係有司機就係一早揸車返咗屋企，然後坐番的士出嚟飲。有一次約港島朋友到沙田馬會五樓食晚餐，朋友話：「去嗰度唔飲酒就冇癮，我冇司機，往返港島的士費亦貴，你不如請我去山光道馬會打吡廳。」老實講，沙田馬會五樓Centurion嘅西餐「性價比」甚高，相當唔錯，但從來冇乜人幫襯，有一次大富豪K請吃午飯，特別要去Centurion，叫喼頓開一瓶紅酒，佢大讚一番，問佢點解要去到沙田，大富豪K話：「呢度少人，夠晒清靜，傾偈方便啲。」可惜唔係個個有司機車去沙田呢。
小YY去完台灣放假幾日返嚟，問佢好唔好玩，佢話個女（三歲半）就好興奮，佢就比較緊張，搭地鐵與火車之時，「捷運斬人事件」總係浮上腦海，不自覺咁攬實個女，攬攬吓，自己都笑起上嚟，鬆番手，覺得自己行動過敏。小女孩點解興奮，原來在宜蘭民宿，間大睡房裝修到似足「Frozen」個佈景，兩張睡床上就係樓梯滑梯，小女孩可以成晚玩滑梯，唱let it go不停，可謂百分百親子。
一返到香港，就聽到倫敦羅素廣場斬人事件，一名美國婦人死亡。小Y Y嘆一口氣：「現在出外旅行，有乜辦法唔緊張呀！」小YY曾在倫敦打工一年，住在羅素廣場附近，每晚在地鐵站落車行返居所，現在斬死人嘅地點係佢必經之路，雖然已離開多年，但有此等事情發生，感情上仍然拋唔開。羅素廣場位於倫敦中心區Bloomsbury，區內有LSE，UCL，SOAS三間著名大學，學生教授及遊客特多（因大英博物館就在羅素廣場不遠處），呢次斬人兇手又係非洲移民（挪威籍索馬里裔），只得19歲，更加深歧視移民心態。今次慘死嘅女士嘅老公係佛羅列達州立大學教授，到倫敦教書一年後，本已訂了回鄉日期（九月前），點知就碰上災難！無怪好多人出外旅行，不期然就會緊張起嚟，世事難測也。