咪以為後生仔先跟潮流，63歲嘅九倉（004）主席吳天海都趕潮流㗎。
噚日九倉舉行業績會，吳天海個樣望落好醒神，睇真啲，原來係換咗副眼鏡。以前佢戴開金屬框，典型專業人士造型，坦白講，真係有啲out out哋。佢都承認「為咗趕潮流，又見幾好睇，最近咪換咗囉」。
唔知係咪見九倉業績有改善，吳天海心情都幾靚，會上突然話要同傳媒玩遊戲，叫人記一堆同業績有關嘅數字，「今年我哋上半年個總營業額20個B（billion），20……」跟住一路開始數「8、6、14、11、16」，笑笑口話呢度有6個數字，「特別號碼就係130，今年我哋130周年記念」。
唓，講咁耐，原來想話今年係九倉130周年！講多無謂，周年記念會唔會派特別息嚟賀一賀先？佢就冇答囉。