康健國際（3886）創辦人曹貴子早前透過「曹貴子基金會」，捐咗筆錢畀香港教育大學，為表謝意，教大將校內行政大樓命名為「曹貴子基金會大樓」，噚日舉行命名禮。
咁啱曹醫生噚日53歲牛一，教大順便幫對方切蛋糕慶祝，教大校長張仁良除咗搵學生畫咗幅畫作為禮物，又上台唱生日歌，睇嚟曹醫生捐嗰筆錢，應該都好大筆嘞。
曹貴子唔肯透露捐款金額，只係話舊年8月走訪多間大學，當時仲未升格大學嘅教院，本質同其他院校唔同，而香港大部份幼稚園同小學嘅老師都來自教院，加上其他大學已有好多人關注，於是佢就選擇捐款畀教大。
曹貴子除咗係醫生，本身亦活躍於股壇，對於最近市場就上市架構改革進行諮詢，惹來唔少反對聲音，曹貴子就直接話「唔想comment」。可能佢見市場咁多人出聲，佢唔使加把口喇。