喺英超開鑼前夕，曼市雙雄搶晒風頭，你一個保羅普巴，我就一個史東斯。至於阿仙奴就一貫低調，繼續一年一星嘅政策，嗰粒星就係晨早就買咗嘅瑞士中場格列沙加（圖）嘞。
呢幾年阿仙奴開始有錢，但雲格亦冇大使，每季只重槌買一粒，再例牌買啲小將栽培吓。雲格之前三年買嘅奧斯爾、阿歷斯山齊士同施治都表現對辦，沙加可能冇乜星味，但小弟相信沙加可以令阿仙奴中場升呢。
近幾年，阿仙奴喺holding midfield呢個位都冇乜人可用。之前有阿迪達，而阿迪達傷多過踢嗰陣，就搵辛迪卡索拉墮後，但卡索拉上季大傷過，又開始老，加埋艾利尼級數又唔夠高，係時候搵個長遠踢holding midfield嘅人選。沙加一直係德甲長傳王，上季場均7.4次成功長傳，亦係門將以外最多嘅球員。小弟信佢嘅長傳可以改善阿仙奴弱點，以往兵工廠慢慢短傳上前場，結果傳到上去，人哋都返晒嚟，焗住踢攻堅戰，好難咬得入對手。有沙加嘅長傳後，進攻可以更直接。
相比曼聯嘅普巴啱啱度完假，可能過多一個月先搵番狀態，沙加一早歸隊，踢咗幾場友賽，相信季初已經發揮威力；同埋大家都淡忘咗沙加，壓力亦都細啲，有助佢適應英超。唔計唔知幾時先冇傷嘅韋舒亞，阿仙奴今季儲到四個踢得嘅防中，沙加、艾利尼、高基連同卡索拉，雲格可以按唔同對手出牌，值得期待。文：咖喱