下星期一有好戲睇！金融服務界11個業界組織，將於本月15號收市後，喺交易所舉行論壇，好似英雄大會咁，畀3名立法會金融服務界候選議員自我介紹兼質詢對手。
詹劍崙話要打低張華峰
3名候選人已收到英雄帖，詹劍崙（Ricky）準備充足，只望到時主持人提問，對所有候選人公平，唔會偏袒是但一位。佢政綱好簡單，就係要誓死反對證監會提出嘅上市架構改革諮詢，同埋要打低現任議員張華峰，真係拭目以待。
競選連任嘅張華峰就話，「冇準備，講番自己事實」，佢知道市場有人批評佢，過去4年冇乜建樹，佢反駁話：「呢4年個個都知，講我冇做嘢就唔成立，講我支持證監奪權（證監與港交所正就上市架構改革進行諮詢），呢啲就係莫須有。」OKOK，冷靜啲。
另一參選人亨達徐聯安似乎比較低調，話未知道辯論嘅詳細規則，但具備一定常識嘅人，任何辯論都好容易處理，「唔敢話係我所長，但都好有信心」。
呢場論壇係由11個金融業界組織聯合舉辦，主要畀業界人士參與，主辦單位係各組織嘅阿頭，由證券學會會長李細燕牽頭，今日下晝會討論辯論程序。交易所展覽廳可容納200人左右，暫時聽到唔少業內人士都有興趣去湊熱鬧，剝花生睇戲。