香港歌手陳奕迅（Eason）都有去巴西？可能大家望到中華台北女子舉重選手林子琦嘅時候，真係忍唔住想唱番句「如果我是陳奕迅…」，因為佢同Eason真係好鬼似樣！不過，好可惜大家唔會喺奧運見到呢個體壇Eason登場喇，因為佢藥檢失敗導致被禁賽。
林子琦原本喺周二出戰女子63公斤級舉重決賽，佢喺賽前係呢個項目嘅世界紀錄保持者，當然係奪金大熱門嚟啦。不過，呢位28歲嘅體壇Eason賽前就俾世界反禁藥組織（WADA）驗到佢疑似食過禁藥，所以罰佢停賽；因為林子琦喺2010年有誤食禁藥嘅紀錄，所以有可能會被罰停賽長達四年。
林子琦今次真係禍不單行，除咗冇得出戰之外，本身所保持嘅世績（261公斤）亦都俾中國選手鄧薇打破；鄧薇喺抓舉舉到115公斤，挺舉就147公斤，以總成績262公斤贏咗金牌，兼刷新世界紀錄。
金正恩下令要贏五金
雖然早前南韓《東亞日報》大爆北韓領導金正恩落咗命令，今屆奧運代表團至少要贏到五面金牌，不過女子舉重選手崔考辛似乎有心無力喇，只能以總成績248公斤喺呢個項目摘銀，而銅牌就由哈薩克選手歌莉卓娃以總成績243公斤奪得。其實北韓喺1992年巴塞隆拿奧運至2012年倫敦奧運期間，最勁都係單屆贏到四金，所以今屆要攞五金，好似有啲難度喎。