一條自編自導自演嘅6分鐘短片，講述狗仔由被寵愛到被遺棄嘅短暫一生，近日熱爆全城，至今已經有近58萬人次觀看，仲喺台灣引起好大迴響，原來拍片嘅係香港90後女魔術師何穎璇，因為成日喺網上見到有動物因為主人感情生變而慘被遺棄，好想大家養動物前停一停、諗一諗，所以拍片宣傳下，估唔到紅到台灣!
台灣新聞轉載
人稱「Miss Hunny」嘅何穎璇其實係YouTuber，亦係香港少見嘅女魔術師。平日魔術隨手拈來為觀眾帶嚟歡樂，但對於遺棄動物再獲寵愛卻苦無對策，佢同八方講，「我本身都有養兔仔，每次上兔協見到其他被遺棄嘅兔仔都好心噏。」
原來佢姐姐加入咗拯救流浪動物行列，除咗原先領養嘅幾隻大狗，近日又收留四隻啱啱出世嘅貓仔，更加令佢反思棄養動物嘅問題，於是搵咗幾個朋友花一日時間，拍攝名為《全世界，我最愛你了》短片，以第一身視點講述小狗Noddy嘅故事，由作為女主人男友贈送嘅聖誕禮物，獲萬千寵愛；至主人情海翻波，日漸被無視甚至嫌棄，最後被遺棄及送到動物收容中心，最終難逃安樂死命運。
嘩，聽到都想喊，何況係睇片？難怪短片令唔少人動容，紛紛廣傳以喚醒棄養動物係幾咁可憐。就連台灣唔少新聞頻道，都有轉播同介紹呢條洋葱短片，足證呢位女魔術師，幾咁有威力。何穎璇強調，絕不支持將動物當禮物送畀人，寄語天下有情人，他日即使情變，都唔好遷怒於愛侶贈送嘅寵物呀。
李八方
mailto:[email protected]