新東爭取連任嘅人民力量議員「慢必」陳志全，經常喺議會抗爭，更曾跳出自己個位，佔領立會主席台。
但平日紮紮跳的慢必，都有失手之時，噚日佢喺fb透露，朝早起身因為飲水濁親，咳咗幾下，整親腰骨，條腰一度痛到伸唔直，行路都要彎低身，要立即約中醫做推拿。雖然條腰傷咗，但慢必好快就如常落區拉票，網民都叫慢必多啲休息，懷疑佢今次整傷，係因為選舉期間太累所致。
慢必黨友「快必」譚得志就留言話：「我有次條腰實晒，去抗爭時，俾差佬抬一抬，啪啪聲，鬆返」。八方問過慢必，佢話中醫指佢舊患發作，睇完中醫已即時去粉嶺派傳單，話選舉期間，就算坐輪椅都要努力拉票。該區其他參選名單，請參閱本報立會選戰網站 http://hk.apple.nextmedia.com/legco2016/region 。