煤氣公司位於北角嘅總部大樓建成23年，2012年展開綠化翻新計劃，工程去年完成，最近仲獲得香港綠色建築議會頒發「綠建環評既有建築1.2版」最終鉑金級別認證，係本港首幢獲呢項認證嘅非住宅建築物。
煤氣噚日邀請傳媒參觀呢幢綠色建築，物業管理經理盧鑑明同八方講，公司特別設計一套管理程式，透過電腦監控，將唔同樓層分區，設置人體運動感應器，設定上班、午膳、超時工作嘅空調同照明開關時間，可以按照辦公室不同人數排出嘅二氧化碳量，自動調校接連天台抽風機嘅速度，減少耗電量。
煤氣喺天台更設置有機農場（圖），配合有機耕作工作坊，讓員工體驗耕種樂趣。論整體成效，2015比2012年耗電量減少15%，節省100萬千瓦小時電力，慳番122萬能源支出㗎！