孫楊有冇受言論影響就真係唔知，但佢見到傅園慧喺女子100米背泳同加拿大嘅瑪絲並列季軍後即刻開心晒，主動去抱呢位小師妹。不過，有「體壇火雞姐」之稱嘅傅園慧繼續放笑料，佢完成比賽後完全唔知自己拎第三，講笑話因為自己隻手太短先會輸。火雞姐爆紅，網民當然幫佢起底，仲發現今年一月參加CCTV體壇風雲人物頒獎禮，着住高叉裙同郎朗一齊，真係幾鬼索㗎。
火雞姐早前受訪時表情多多，估唔到仲因為咁而變成網絡紅人，搞到佢都話好大壓力：「我都估唔到有人會鍾意我呢類人，佢哋會唔會太重口味？」火雞姐講到自己冇乜人鍾意咁，網民起佢底都發現佢似乎仲係單身。不過，火雞姐曾經大爆自己嘅擇偶條件，仲話寧澤濤呢類小鮮肉唔係佢杯茶：「其實我都未拍過拖，所以都講唔出自己嘅擇偶條件係乜，不過我鍾意啲比較成熟穩重嘅男人，我只係當寧澤濤係一位大哥哥咋。」