選舉工程有幾辛苦？隨時日曬雨淋，朝企晚派，捱出大病來。好似復出再戰新界東立會選舉嘅鄭家富咁吖，因為主打環保選舉工程，同上屆一樣搞無單張綠色選舉，主要靠開街站同選民接觸，企街時間加倍，可能因此捱壞身子。
阿富同八方講，上周末起雙眼開始唔妥，近日仲發炎，但唔使擔心，唔會傳染，不過相信有啲選舉工程暫時要停一停。
相信阿富都估唔到，有啲街坊咁「窩心」，皆因佢最近喺沙田新翠嘅一塊banner（圖）雙眼俾人塗到藍晒，阿富喺fb笑稱，「雖然我近日患眼疾，但都唔使咁樣幫我滴藍藥水」。不過阿富話唔會換走塊banner，「都係一個歷史見證，哈哈」。該區其他參選名單，請參閱本報立會選戰網站 http://hk.apple.nextmedia.com/legco2016/region 。