巴西里約奧運似乎同男子網球壇「一哥」祖高域嘅八字唔多夾。代表塞爾維亞嘅祖高域喺周日於男單首圈爆冷不敵阿根廷嘅迪樸度出局之後，諗住喺周一嘅男雙次圈挽回面子兼吐一口烏氣，點知佢同施蒙積面對東道主巴西嘅美路同埋梳亞利斯時，又係表現麻麻，結果輸0:2出局。不過，祖高域今次就冇好似單打出局嗰陣咁樣淚灑球場，唔知係唔係欲哭無淚呢？