巴塞隆拿公佈新球季嘅球衣號碼，舊人號碼就冇乜變，球迷最關心嘅都係啲新兵着乜號碼。今季巴塞會有兩個蘇亞雷斯，一個係着九號嘅烏拉圭前鋒「大蘇」蘇亞雷斯，至於另一個係今夏加盟嘅前維拉利爾中場丹尼斯蘇亞雷斯，因為佢得22歲，就叫佢「細蘇」啦。以前踢過巴塞B隊嘅細蘇，會着咗丹尼爾留低嘅六號球衣，法國中堅烏姆迪迪就着華美倫件23號，而安祖高美斯就會着21號。