踏入8月業績期，以往多數由東亞銀行（023）搶先，成為首間公佈業績嘅銀行股。今年情況卻有變，滙控（005）、渣打（2888）公佈晒業績，佢都冇影，直至噚日佢先宣佈，將於本月19日公佈業績，嗰日星期五嚟喎。市場對於忽然轉去周五公佈業績嘅上市公司，一直有啲介心㗎喎。
話說本地上市銀行公佈業績，一直好有規律，通常會由東亞打頭陣，之後滙控、恒生銀行（011）同日出，隔幾日就到渣打，月底就到中銀香港（2388）咁，東亞推遲業績公佈日，市場好多人都覺得係有啲重要事先會咁。
而星期五亦係相當蠱惑嘅時間，如果東亞選擇收市後公佈業績，再有乜嘢宣佈，到時就有星期六、日兩日俾市場消化，股價受到嘅衝擊可能會減少。
咁啱東亞近年不停俾對沖基金Elliott狙擊，遲啲仲要第二度對簿公堂，家陣又話周五出業績，成件事相當耐人尋味。