揸住年輕人蒲點朗豪坊嘅冠君產業信託（2778），上月開始有位靚女行政總裁（CEO）王家琦（Ada）。噚日業績會，佢例牌要sell朗豪坊有乜好，佢好緊貼潮流喎，猛話個場有比卡超捉，仲好多人放櫻花，叫大家多啲去朗豪坊。
Ada未夠40歲，上月升任CEO，雖然係上市公司高層，但同年輕人一樣熱衷於捉精靈，佢話已經捉咗好多Eevee（伊貝），仲升晒級，有齊大家都想要進化嘅火伊貝、雷伊貝同水伊貝三種。仲話下一個目標係捉100隻鯉魚王，去升級做鯉魚龍。佢之前去到英國都有捉，仲捉到歐洲特別版嘅小精靈，真係堅鍾意！
講開又講，前任CEO李澄明一向官仔骨骨，今次Ada第一次主持業績會就以橙色圖案短裙亮相，非常sharp醒。佢話，作為小數嘅女CEO，都想畀大家耳目一新嘅感覺！