熱門遊戲Pokémon GO繼香港之後，早兩日都開放畀台灣用戶玩之後，有香港「打機達人」之稱嘅香港電競（HKES）創辦人鍾培生，親自帶隊由香港過台北踩場，一邊捉精靈，一邊周圍踢館挑戰有著名地標模擬嘅道場。
鍾培生嘅爺爺係已故「工廈大王」鍾江海，家族經營收租物業，更有上市公司華廈置業（278），難怪呢位富三代可以將打機當事業。
佢嘅Pokémon GO賬號已經有32級，入面亦有好多強勁精靈，例如能力值升到差唔多爆標嘅啟暴龍、奉神犬、鯉魚龍同卡比獸等。台北多座地標，包括101大樓、新光三越、中正紀念堂、總統府道場等，全部都俾佢「佔領」。
當然，作為電競公司創辦人嘅鍾培生，又點會自己一個飛過去挑機咁「毒」，佢帶埋打《英雄聯盟》（LOL）知名嘅統神同林釆緹等多個網絡紅人一齊打道場，成班人一齊玩，點都好過一個半個去踢館嘅，至少有人幫手。
唔知幾時台灣又有打機達人「搶佔」香港IFC、ICC呢啲地標，嚟一次手機界「港台大戰」？