香港人不嬲三分鐘熱度，同時亦愛一窩蜂。最近政界中人玩facebook直播蔚然成風，估唔到熱潮殺入領事界別，繼前美國駐港總領事夏千福上月卸任前喺fb同網友live chat，英國駐港澳總領事吳若蘭亦預告，下星期四即係18日下午一時正，喺「UK in Hong Kong」嘅facebook專頁進行直播。咦，一點鐘係普遍打工仔放lunch時間 ，唔通若蘭BB特登揀呢個時間，係想陪大家開餐？
英領館喺facebook專頁話呀，網民可以預先留言發問，屆時總領事即係若蘭BB有機會親身解答。消息一出唔少網民已經留言，主題不出所料，離不開香港嘅前途問題。唔少「歸英派」網民問：「香港幾時可以回歸英國懷抱？」「幾時收番香港？」亦有網民覺得英國唔太負責任，質問點解當年港英政府未有就香港前途問題進行公投？
睇嚟睇去，啲問題都好鬼嚴肅，唔似得千福BB咁，會有人問佢平時鍾意食啲乜？香港文化又有幾咁獨特？如果八方有機會發問，都想知道若蘭BB喺東半山豪宅The Opus，住得慣唔慣？會唔會仿效夏千福，多啲微服出巡同港人打成一片？
李八方
mailto:[email protected]