孫楊俾賀頓寸係食禁藥嘅騙子，中國網民嘅玻璃心梗係碎晒啦；所以孫楊喺周一舉行嘅男子200米自由泳奪冠後，就令強國網民更加落力去鬧賀頓；不過澳洲網民似乎除咗禁藥之外都冇乜好鬧，於是笑孫楊棚牙核突！
掟帽失威牙核突
雖然孫楊喺男子200米自由泳以1分44秒65贏冠軍之後，即刻振臂歡呼仲不斷咆哮，似乎想要宣洩400米自由泳輸畀賀頓嘅不快；佢喺接受訪問時仲話：「我用呢面金牌證明自己嘅能力，我真係好開心！」但係當孫楊行過觀眾席，除低泳帽掟畀班粉絲時就霸氣盡失喇，因為頂泳帽掟唔到上去，反而向後跌番落泳池，搞到自己勁尷尬咁行去執番！不過，強國網民梗係當睇唔到啦，佢哋即刻借啲意鬧賀頓係腦殘，嗌佢參加殘奧會喎。眼見中國網民係咁攻擊賀頓，澳洲網民梗係睇唔過眼還擊！佢哋就話孫楊棚牙又黑又唔齊，勁似大白鯊啲牙喎。就連喺男子100米背泳拎第五嘅法國泳將勒確都忍唔住加入戰局，話禁藥騙子可以贏金牌實在太嘔心，仲話孫楊食禁藥隨時搞到屙啲尿都係紫色！
