雙曾起勢跑呀跑，咁盛傳都係下屆特首熱門嘅政務司司長林鄭月娥係咪大落後？相信都唔係，否則未必繼續努力出巡，噚日仲聽細路哥講古仔。
林鄭噚日出席中電幼稚園教材套啟動禮，孖住中電總裁潘偉賢聽小朋友講慳電故事，聽得興起仲同佢哋玩手偶公仔，小朋友仲一度出題考佢嘅環保知識，林鄭當然輕鬆過關。
中電搵林鄭主禮有原因，因為林鄭兩個囝囝分別叫林節思同林約希，中間個名夾埋就係「節約」嘞！林鄭話甚少出席商業機構嘅活動啟動禮，但中電呢套教材套有意義，值得支持。集故事書、兒歌同桌上遊戲於一身嘅教材《看到的電力》，中電會派畀全港近千間幼稚園，雖然9月開學先有得用，但已上載至 http://www.clp.com.hk/PowerYou 供免費下載。