巴西奧運男足聲大大話要喺地頭為國家歷史性贏奧運首金，點知一路都冇貨賣。呢支由巴塞隆拿球星尼馬領軍嘅奧運隊，繼首輪悶和南非後，喺周日A組第二輪比賽又失分，0:0賽和伊拉克。莫講話奪金，𠵱家巴西出唔出到線都好難講，難怪現場球迷噓爆隊波之餘，仲一齊大嗌女足主將瑪達個名，支持女足好過睇你班友唔知踢乜。
巴西足球近年已經變咗衰波保證，兩年前喺主場出戰世盃決賽周，踢到四強俾德國大炒7:1；之後今夏美洲國家盃，巴西竟然分組賽就出局；到里奧再次主場出擊，佢哋有尼馬壓陣，目標梗係直指金牌，但周日0:0賽和伊拉克後情況唔多對路，兩戰全和零入球。𠵱家巴西同伊拉克同樣得兩分，巴西喺A組煞科戰要對榜首丹麥，而伊拉克就對實力較弱嘅南非，稍有差池隨時無緣八強。
悶和伊拉克出線現暗湧
比賽喺巴西首都巴西利亞進行，有成60,000人入場支持，但無論尼馬定係兩位新星「Gabigol」加比爾巴保沙同最近俾曼城收購嘅加比爾捷西斯，全部都冇料到。踢咗一陣班球迷已經冇乜耐性，不時向主隊報以噓聲，越近完場噓聲就越大；仲有班球迷一齊大嗌「瑪達！瑪達！」，擺明唔滿意班男足，寧願撐吓呢位五屆世界足球小姐好過。臨時拉伕喺奧運帶隊嘅巴西教練米卡爾，賽後都要向球迷「耍冧」：「我哋要向支持球迷同巴西利亞市民道歉。我哋踢唔出最好嘅足球，令你哋好唔滿意。班球員好想打破僵局，但越心急就越心煩氣躁，犯更多錯誤。」
續列3.15倍奪金大熱憑咩？
喺奧運男足開打前，足智彩將巴西捧為1.77倍奪標大熱門，踢咗兩場之後雖然降溫到3.15倍，但仍然係頭號熱門，仲熱過已經提早出線嘅葡萄牙同尼日利亞，希望買咗巴西嘅球迷唔使提早搣飛啦。另一賽前被睇好嘅德國又係未贏到，周日以3:3逼和南韓，𠵱家以4.5倍被列為次熱，好彩佢哋喺C組煞科戰對魚腩斐濟，正路就要數幾多有幾多，出線前景點都好過巴西。
