海洋公園4隻大熊貓安安、佳佳、盈盈同樂樂噚日一齊食特製冰雕大蛋糕慶生！舊年7月底刷新全球最長壽圈養大熊貓紀錄嘅佳佳，以及全球第二最長壽嘅圈養雄性大熊貓安安又大一歲，分別踏入38歲同30歲高齡，相等於人類114歲同90歲，盈盈同樂樂就11歲，噚日則係樂樂嘅正日，梗係擦餐勁慶祝！
盈盈同樂樂今年4月踏入第6個繁殖季節，園方獸醫同四川臥龍國家級自然保護區嘅大熊貓專家為盈盈進行咗兩次人工授精。樂園動物及教育部執行總監蔣素珊話盈盈食慾下降，行為同荷爾蒙水平上嘅轉變都顯示有懷孕迹象，但可能係常見嘅假懷孕，所以只可以喺生產前約兩星期先有機會透過超聲波檢查確定係咪有BB，而大熊貓嘅懷孕期長達72至324天不等。