商經局長蘇錦樑同太太係圈內模範夫婦，原來蘇錦樑娶得賢妻，係關耶穌事。今年57歲嘅Greg蘇15歲到加拿大升學，佢話小學成績唔算好，直至中二先喺北角協同中學考第一，讀書不忘玩音樂，電子琴同結他都拿手，估唔到因此獲年輕老師睇中，「嗰個老師喺出面有隊band，佢邀請我加入，咁我梗係入，跟住佢出去巡迴演出」。佢笑稱嗰時溫拿都未紅，「我出道早過溫拿，哈哈！」
返教會娶到老婆
去咗加拿大，當地夾band風格較funky，Greg覺得唔多啱自己，咁啱嗰時興李小龍，佢就由夾band變學功夫，詠春同太極都學過，笑稱有姿勢但未係好有實際。約17歲返教會聽耶穌，「當時為咗追女仔，就係𠵱家個老婆！」
佢話同太太係當地中學同學，對佢一見鍾情，「但佢最初未鍾意我」，Greg參加過教會嘅冬季退修營，「但原來男士一班，女仔一班，嗰時飢寒交迫咁滯，好辛苦！」Greg話退修未令意中人同佢撻着，追咗近兩年先獲對方歡心，23歲成家立室，佢話追到太太可能同另一招有關：「叫佢教我溜冰囉，溜冰會跣低，由佢扶我，哈哈。」
