周日女子舉重53公斤級賽事，估唔到係一場鬥力又鬥埋智嘅比賽。賽事基本上係中國嘅黎雅君同中華台北許淑淨之爭，前者喺抓舉舉到101公斤，一公斤領先許淑淨，但到挺舉情況就𥧌迴路轉。
裁判彈弓手黎雅君冇成績
中華台北教練蔡溫義先報試舉123公斤，但之後縮沙減到112公斤，佢話許淑淨冇耐前傷過，其實最多只舉到115公斤。更戲劇性係呢邊中國黎雅君第一次試舉123公斤，裁判最先開兩白一紅燈示意有效，但幾秒後因為左手手踭屈曲改番兩紅一白，即係試舉失敗。中國班教練疑似睇唔到慶祝定先，加上蔡教練喺許淑淨穩穩陣陣舉到112公斤後，刻意「報大數」試舉126公斤，逼到中國嗰邊喺之後兩次試舉都加到126公斤。結果黎雅君全部失敗，挺舉就咁變咗冇成績，許淑淨就憑住總成績212公斤智取金牌，幫中華台北贏得里奧首金。
呢位25歲舉重運動員上屆倫奧原本拎銀牌，今年先因為哈薩克金牌得主被揭服用禁藥而頂上奪金，𠵱家仲成為歷來首位累積兩金嘅中華台北選手，預計會收到3,000萬新台幣（約750萬港元）獎金。