今夏其中一單最具份量嘅轉會，祖雲達斯以9,000萬歐元（約7.7億港元）轉會費收購拿玻里嘅阿根廷前鋒希古恩肯定有份。唔止單轉會，原來連希古恩都係份量十足，佢喺周日祖雲達斯作客3:2贏韋斯咸場熱身賽，首次代表祖雲達斯上陣，完全未收身，身形似足之前馬勒當拿典型啤酒肚嘅肥佬咁。
祖記處子戰冇表現
祖記畀9,000萬歐元直接買斷希古恩同拿玻里份合約，外界唔少聲音都指希古恩冇道義，亦有唔少聲音質疑呢位阿根廷前鋒值唔值呢個價，美斯連續三年都喺國際大賽決賽屈居亞軍，三場決賽希古恩都有浪費過唔少埋門黃金機會。
今夏踢國際賽加上之前搞轉會，令希古恩到周日先至首次可以喺熱身賽候命。希古恩喺下半場先入替上陣，不過貢獻就冇乜，反而祖記另外三位前鋒就人人有波入，保羅戴巴拿同文迪蘇傑喺上半場各入一球，之後韋斯咸由中鋒安祖卡路爾連入兩球扳平，到完場前五分鐘，祖記由「鴨仔步12碼王」施蒙尼沙薩絕殺贏3:2。
祖記喺意甲揭幕戰會對費倫天拿，呢場波到20號先開波，希古恩都仲有少少時間去操番fit嘅。
阿根廷人憎到佢死
希古恩喺上季意甲入成36球，相信佢操番起狀態之後，好快就會得到祖雲達斯球迷嘅支持。不過佢喺祖家阿根廷嘅受歡迎程度睇怕就幾難由谷底反彈，之前話希古恩喺14年世盃決賽，同埋之後連續兩年美洲國家盃都錯失入球黃金機會，阿根廷人似乎憎到佢死，最近有公司出咗個遊戲app「Pipita（希古恩綽號小煙槍） on Fire」，玩家可以喺呢個簡單遊戲度控制希古恩射入番嗰啲應該入但現實世界冇入到嘅入球，多少填補下心靈創傷喎。