呢排香港真係俾日本潮流佔咗上風，繼Pok𥌎mon Go搞到滿街精靈訓練員，輪到《聖鬥士星矢》大駕光臨，星矢、紫龍、冰河、阿瞬、一輝首次以神聖衣嘅造型登場，聯同雅典娜女神喺聖域鐘樓同香港粉絲會面，難怪搞到個個粉絲大嗌「燃燒吧！我嘅小宇宙！」
聖衣箱任孭影相
《星矢》漫畫1985年開始連載，1986年推動畫版，作者車田正美親自策劃嘅「聖鬥士星矢 30週年展 Complete Works of Saint Seiya」6月喺日本登場已經掀起本地網友熱烈討論，部份展品噚日移師香港時代廣場，包括250個figures、《星矢》D.D.PANORAMATION系列巨型情景，以及12個1比1等身大、黃道十二宮𤏸金聖鬥士所着嘅金光閃閃星座形態聖衣。
除咗睇，仲有得聽，因為現場會以廣東話播出聖鬥士出絕招時嘅經典對白。同場仲首次展出約5米高嘅人馬座形態紀念像、以及青銅聖鬥士天馬、天龍、鳳凰、仙女及白鳥嘅等身大聖衣箱，大家可以孭住嚟影相。
展覽即日起至8月31日喺時代廣場露天廣場同地面展覽廳舉行，12盞火則於中午12時亮起。由於有5件星矢figure等香港限定產品，所以現場噚日粉絲大排長龍好墟冚。
李八方
mailto:[email protected]