新華保險（1336）似係密密撬走中國人壽（2628）嘅高層喎，好似噚日國壽副總裁兼財務負責人楊征宣佈辭任。雖然去向未明，不過應該同市場傳聞一樣，過檔新華實食冇黐牙。
2014年，國壽前總裁萬峰過檔去新華擔任總裁，今年初仲升埋做董事長，正式執掌帥印，佢出手招攬人才，首先當然向舊部埋手。《財新》今年5月曾經引述消息話，楊征應該過檔去新華做首席財務官。
另外，市傳兩名國壽嘅管理層人士，包括劉起彥同埋王文祥，分別會擔任新華總裁助理同埋董事會秘書咁，不過仲未證實到。至今新華總裁一職仲係懸空，由萬峰兼任，估計都仲要請人。
講番楊征，佢1993年喺北京工業大學畢業，2000年嘅時候喺美國東北大學完成咗個MBA，仲係美國註冊會計師協會，同埋英國特許公認會計師公會嘅會員，履歷相當唔錯。