太古地產（1972）旗下太古城中心有位靚仔總經理鮑麒麟（Kieran Bowers），佢貌似荷里活電影《超人》嘅主角基斯杜化李夫（Christopher Reeve），好易令人留下印象，可惜，大家以後冇乜機會喺太古城中心見到佢嘞，事關佢今個月就調去美國。
太古集團行見習行政人員（Management Trainee）制度，MT多數每隔幾年就有職位調動，做得好就一路調一路升職，鮑麒麟最初喺系內公司國泰航空（293），一做就10年，2008年轉到太古地產，舊年由北京調回香港管理太古城中心，估唔到一年又調去美國邁阿密擔任執行副總裁，明年1月升做總裁，43歲就當總裁，恭喜晒。