求驗客手記：
呢次堅！曼聯簽普巴

擾攘多時嘅保羅普巴轉會戰，周日終於幾近塵埃落定，曼聯官方網頁宣佈，呢位法國中場已經到達球會接受體測，如果完成一切手續後，普巴將會成為領隊摩連奴今夏第四位、亦會係最昂貴嘅收購。

預計轉會費10.1億

出身曼聯青年軍嘅普巴，由歐國盃決賽周未開打前，已經不斷傳出加盟曼聯嘅消息，但全部疑幻疑真，包括摩連奴戰術板已經有普巴個名，普巴喺美國度假為球迷嘅曼聯球衣簽名等，成個暑假都係佢嘅新聞。而直至周日先有官方權威性消息公佈，普巴所屬嘅意甲冠軍祖雲達斯，宣佈容許佢去曼市體測，而曼聯亦喺官網證實呢個消息，據報呢位23歲法國國腳亦秘密到達曼徹斯特，準備好加盟手續。雙方冇公開轉會費，一般預期為1億鎊（約10.1億港元）嘅天價，普巴亦會打破加里夫巴利嘅轉會費紀錄，成為全球最高身價球員。

曼聯預期安排普巴着6號波衫，摩連奴接手後，已經收購前鋒伊巴謙莫域、攻中米希達利恩同中堅艾歷拜利，連同防中普巴，整條脊柱亦成形，但使咗曼聯接近1.6億鎊。而摩連奴亦逐步清洗多餘球員，德國中場舒韋恩史迪加已失寵，據報連同翼鋒路爾斯華倫西亞一同出售至土超球隊加拉塔沙雷，轉會費只係425萬鎊（約4,300萬港元）。