星期二上午有8號風球，上午全港打工仔唔使返工，但天文台預告12時左右除下8號，於是人人準備下午上班。建築邦來電，10時15分就開車返中環，問左丁山要唔要搭順風車，搶先一步，費事稍後遇上交通擠塞。建築邦就勤力啫，佢每逢見到有黃雨紅雨黑雨或風球，血壓就會上升，驚住地盤滲水、水浸或吹冧棚架，有一次晚上遇黑雨，佢直情失眠！依家工程費用高昂，工人難搵，如果連續一個星期落大雨，工程進度想唔延誤都幾難，目前政府驚工程超支驚到失魂，建築邦等公共工程承建商，受好大壓力㗎。
左丁山好彩冇乜工作壓力，星期二一於留在屋企，足不出戶，上午睇完8張報紙、上網，時間好快過，最唔爽就係報販又再漏派金融時報與紐約時報，冇得睇。講起嚟，日本派報效率得人驚，本港報販望塵莫及。肥仔K訂日文版「日經新聞」，朝朝五點半後，六點前就派到佢大門口，冇一次漏派，都唔知係邊個代理做得咁醒目，第二日撞到勤力德，要問吓佢。
下午冇乜好做，於是量吓血壓，量六次，次次數字不同，究竟是高定低？近日啱啱收到李錦滔醫生送來一本新書「家常健範」，於是拿來一看。李醫生係醫管局新界東醫院聯網社區及基層健康服務總監、威爾斯親王醫院副行政總監、中大榮譽內科教授。李醫生與沙田醫院內科及老人科主管許鷗思醫生及新界東醫院聯網家庭醫學部顧問醫生林璨合作主編「家常健範」呢本書，搵齊20幾30位醫生、專家，全部來自新界東醫院聯網嘅，主要係家庭醫學專科，合寫17章講述介紹不同香港常見疾病及護理方法，包括心臟、糖尿、腎病、肺病、關節痛、腸敏感、大腸癌、前列腺增生、抑鬱症、傷風感冒、痕癢、鼻敏感、老年認知及選擇合適院舍等等，內容可說包含少年到老年常見疾病，好有教育性，李錦滔醫生在序言話：「注意個人健康，不生病，不需要醫護照顧是最理想的。」當然係啦，預防勝於治療，讀呢本「家常健範」（即家庭常遇健康典範），學番幾招，平時注意飲食、運動，防止或減輕慢性病，已經省回不少公共及私人資源。左丁山量完血壓，搵呢本書睇吓，知道膽固醇理想水平（第18頁）、空腹血糖水平（28頁）及血壓上下限（第10頁）等等指標都比標準（benchmark）好少少，成個人舒服晒，再量血壓，竟然低咗，可見心情狀態與血壓高低有直接關係。