【本報訊】心瓣能防止血液倒流，但感染及年紀大等原因可致心瓣退化。伊利沙伯醫院引入微創換心瓣技術，今年6月更完成亞洲首宗「導管三尖瓣中瓣植入手術」，病人因風濕性心臟病已換了人工二尖瓣及三尖瓣，惟人工三尖瓣再退化，出現心衰竭症狀需再做手術，方法是以導管將微創心瓣帶入心臟，放置在原先人工心瓣上，然後再因應病情進行主動脈瓣置換，即兩個置換心瓣手術同步進行，為全球首次。
記者：嚴敏慧
心臟有4個主要心瓣，分別是主動脈瓣、二尖瓣、三尖瓣及肺動脈瓣，心瓣張開時讓血液流過，關閉時防止倒流，令血液可正常地循環全身。惟年長、感染等會令心瓣退化，導致心瓣疾病。
77歲的岑婆婆患有風濕性心臟病，10多歲時因嚴重感冒，細菌入心破壞心瓣組織，曾做手術擴充心瓣，但其後仍出現嚴重二尖瓣及三尖瓣倒流，1998年接受金屬二尖瓣置換，2007年再做生物製三尖瓣置換。但約兩年前開始有無力等病徵，近半年症狀加劇，出現呼吸困難、輕微下肢水腫等心室衰竭病徵。
「瞓覺要用3個枕頭，但半夜都會唞唔到氣醒」，由於心功能差平躺時肺易積水，她經常要起身望天光。其子蔡先生指，媽媽睡眠很差，導致日間沒有精神，經常會對他們抱怨「好辛苦」，說話也沒聲沒氣。岑婆婆較早前接受心臟超聲波檢查，發現三尖瓣再嚴重狹窄及倒流，主動脈亦有中等至嚴重狹窄，但醫療評估指她不適合做開胸手術，亦無藥物可以治療，醫生估計她的心臟可能於兩年內失去功用。
想輕輕鬆鬆健康?，記住留意健康蘋台
http://health.appledaily.com.hk/
3D打印模擬手術
岑婆婆經轉介到伊利沙伯醫院再評估，醫生認為她可以進行經皮導管三尖瓣中瓣植入術。該院心臟科顧問醫生李耿淵指出，手術是以微創進行，利用導管將支架連同微創心瓣，從腳血管帶到原先人工三尖瓣位置，再用球囊泵氣將支架擴張，令新心瓣取替舊心瓣功能。手術為亞洲首次，事前要利用三維打印，製作病人原大心臟模型，無數次進行手術測試，「試吓邊個位入好啲，點擺個支架最準」。三尖瓣手術完成後，醫療團隊為病人即時評估，發現因血流暢通，令主動脈瓣狹窄情況加劇，需即時進行「導管主動脈瓣植入術」，整個手術歷時近4小時，兩個手術同步進行更為全球首次。
岑婆婆住院7日已可出院，現康復理想，面色較之前大有改善，早前回醫院檢查，更可不用枕頭平躺逾半小時，未有出現呼吸困難。李指，每年有2至3宗植入人工三尖瓣病人出現心瓣狹窄及倒流問題，料可受惠於新手術。
