英國《太陽報》出咗個獨家故仔，我求大俠姑且講畀大家聽，睇吓大家信唔信嘞。利物浦中堅洛夫雲今夏冇份為克羅地亞踢歐國盃，原來係為咗追番個老婆。27歲嘅洛夫雲面對緊婚姻危機，佢26歲嘅老婆安妮達紅杏出牆，同做林木工人嘅舊朋友杜比歷搞埋一齊。雖然有話「綠帽唔怕戴，最緊要除得快」，但洛夫雲好愛佢老婆，決定要重奪芳心，所以洛夫雲唔踢歐國盃，同安妮達去咗兩個星期旅行，希望可以𠱁番老婆。
不過，根據之前嘅報道，洛夫雲係同教練不和，所以先冇得入選國家隊，唔知大家信邊個版本嘞！講番利物浦，佢哋上周六就威威，以4:0喺國冠盃大勝巴塞隆拿，呢場波仲創咗溫布萊史上第二多嘅入場人數，有89,845名觀眾捧場。