出戰超級區議會嘅民建聯周浩鼎，趁奧運剛開幕，噚日又係香港全民運動日，就喺大埔廣福邨搞咗個「超級浩鼎乒乓波」活動，分超級同無敵兩隊對打，抄大台嗰個掌門人乒乓波遊戲，話要響應奧運、振吓士氣，一路打一路講為國家隊同港隊加油打氣嘅說話。
之但係佢一邊話要攞晒金牌，另一邊為咗唔重複，就高叫攞晒啲銀牌，之後各自不斷叫：「抽低美國、抽低英國、抽低日本……」中國隊首日果然一面金牌都冇，但攞咗好多銀牌喎，真係開口夾着脷。
佢哋之後仲hardsell自己「強項」，包括反港獨、反同性婚姻合法化。超區候選人仲有涂謹申、鄺俊宇、李慧琼、王國興、梁耀忠、何啟明、關永業及陳琬琛。