【本報訊】大學聯招（JUPAS）今日放榜。應屆文憑試（DSE）考生Will曾因母親的催谷壓力變得反叛，輟學當「洗頭仔」，然而他投身社會後，「唔甘心只係洗頭仔」，輾轉重返校園，最終考獲6科33分佳績。Will冀以從事投資、獨力照顧家庭的母親為榜樣，修讀科大計量財務，「希望自己有志氣，唔好俾人睇死，將來可以靠自己」。
記者：葉偉東
就讀天水圍伯裘書院的Will說，母親「將期望投射喺自己身上」，他5歲就要學樂器，3年內考獲八級鋼琴、七級長笛，為入讀英中鋪路，「真係試過彈琴彈到喊，好記得，要返學嘅日子練個半鐘，唔使返學就3個鐘，不斷操考試歌，想彈吓喜歡嘅都唔得」。
輟學因「想激吓阿媽」
Will如母所願升讀地區名校，卻變得反叛、沉迷打機，「一日打10幾20個鐘，打到返親學都遲到」，結果因操行差被踢出校。他索性輟學當髮型屋學徒，「一日10個鐘，時薪30蚊，開頭唔慣，洗到隻手都紅晒」。事後回想，Will稱輟學或因「有少少係想激吓阿媽」，「其實我都唔係特別鍾意打機，可能都只係喜歡戴上耳筒與世隔絕個感覺，唔使聽到父母鬧交」。
當洗頭仔長達1年後，Will決心再讀書，「當時做嘢會好仰慕啲客有錢，就會諗自己唔應該係咁，我唔甘心只係洗頭仔，想有個decent life（高尚生活）、收入穩定」。重返校園後，Will因學業壓力而失眠，又遭逢父母離異，「瞓唔到，好多嘢諗，一時又驚自己唔夠分，晚晚朝早5、6點先瞓到」。他因此經常遲到、走堂，被迫轉校重讀中五。
母子相依，卻曾經勢成水火。Will自言兩母子都不懂表達自己，母親身兼數職，教琴養家又要獨力照顧兒子，「大家谷埋谷埋，就一次過爆；試過有次佢拖地，發現我啲鞋阻住，就突然嬲嬲地攞對鞋掟我」。
靠服藥打波克服病情
Will又遺傳母親的火爆性格，「鬧到隔籬屋都聽到；佢就心痛個仔鬧佢，不斷喊，又叫我搬走，我就鬧到無晒聲，又講起自己細個俾佢打，最尾就入房喊」，最後召警到場調停。
Will遲至今年文憑試前夕求醫，靠服藥和打波調整作息時間克服病情。Will說母親近年已沒在學業上給他壓力，只稱「入到大學就係叻仔」，他最終考獲33分，物理科考獲5**，數學、數學延伸及化學科考獲5*，原本心儀傳理相關學科，最終還是按母親期望，報讀與投資相關的科大計量財務，「有少少係想滿足阿媽嘅心願」。一如其母身兼數職，靠炒股、投資置業養家，「呢方面阿媽係好有志氣，我都好欣賞，亦希望學到佢呢一方面」。
母子經歷連番波折，現年19歲的Will表示理解她的難處，「其實佢都係因為太錫我，所以先搞到壓力好大」。現時母子關係漸改善，「可能有時有啲嘢，我都會透過Miss同姑娘講佢聽」，「有時唔使講嘢，可能我幫吓手做家務，佢煲個湯畀我飲，都已經可以感受到雙方嘅關心」。