有319隻江西豬豬山長水遠南下香港等俾人食，點知漁護署抽驗出有殘餘哮喘藥，結果就壯烈犧牲咗，直接葬喺堆填區。俾哮喘豬搞到一頭煙嘅食物及衞生局局長高永文，噚日say完sorry就拍心口推銷，叫大家唔使擔心坊間豬肉有問題，但佢出席活動切完燒豬後，就一支箭走咗去扒龍舟，完全唔畀面隻豬。掛住銷豬卻唔食燒豬，唔通民望高都聞豬色變？
醫學會搞同樂日
香港醫學會噚日搞咗個龍舟同樂日，陣容都幾鼎盛，有民望高、醫學會會董蔡堅、仲有好鍾意唱兒歌嘅陳以誠醫生。民望高呢排同豬認真有緣，扑完咪講哮喘豬，仲有儀式都安排咗隻燒乳豬等佢切吓，不過，唔知佢係咪同豬接觸得太多，對豬有啲滯，點完睛就嗱嗱臨上咗龍舟，可能見到啲人熱情邀請，民望高又想熱吓身啩，霎時忘記有隻燒豬等緊佢，搞到大會主持都要喺沙灘開咪嗌佢，先識返轉頭同燒豬再聚！
但係佢切完燒豬都冇食番件，又趕住出去扒龍舟，最終8隊入面以第5名衝線。眼見隻燒豬咁靚仔，又點會係食哮喘藥大？怕且民望高係太專注要去扒龍舟啫！
李八方
mailto:[email protected]