循建築、測量及都市規劃界出戰立會嘅中大學者姚松炎（圖），噚日同埋助選團由西營盤踩單車出發，經中山公園，踩至灣仔一間有單車泊位嘅餐廳，推廣城市單車徑。原來姚松炎係單車發燒友，但係港島到處都唔准踩，佢多數喺置富踩，最近仲教識兩個囝囝踩車㖭！
佢兩個月前專程到荷蘭踩單車，考察歐洲單車政策，順道參觀荷蘭社會房屋、社區農圃同創意藝術區，眼見荷蘭到處係單車徑等綠色基建，覺得改善空氣、減碳排放而達致健康生活好重要。佢話民間一直爭取港島單車徑，可以透過實驗，包括即將舉辦嘅「天光ride」同行動證明港島踩車可行。姚松炎嘅對手有謝偉銓同林雲峰。