美國男籃繼續傷害中國人民感情。上周六里約奧運籃球分組賽揭幕，爭金大熱美國喺A組首戰中國；佢哋之前兩場友賽平均贏中國49.5分，今次竟然唔顧及中國球員同廣大球迷嘅情感，以119:62大勝57分，普遍莊家都係開美國讓48.5分，美國唔留手（或者已經留咗）嘅情況下，順利開出上盤。
迪洛桑猜贏畢拿射罰球
除咗贏波，美國都幾唔尊重對手，佢哋第三節博到技犯，射手迪洛桑（DeMar DeRozan）同占美畢拿（Jimmy Butler）竟然以猜包剪揼方式嚟決定邊個射（小圖），結果迪洛桑猜贏咗。
嗱，中國雖然大敗，都唔係冇亮點㗎，「易帝」易建聯就獨取25分，同美國前鋒杜蘭特（Kevin Durant）一樣，而新晉控衞趙繼偉第四節帶波過半場時，一下插花就搞到美國前鋒保羅佐治（Paul George）失平衡，呢下ankle break認真有睇頭。A組周一上演次輪比賽，美國對委內瑞拉，中國就要面對馬刺後衞柏加（Tony Parker）等NBA球星領軍嘅法國。