本港米芝蓮推介餐廳詠藜園近年越洋招聘美國大廚Ricky（圖），由老闆楊王小玲親自傳授宮殿御用雲吞雞秘制菜單。44歲嘅Ricky生於邁阿密，先後喺意大利、法國餐廳任大廚，一直對中國菜感興趣，兩年前經朋友介紹到香港詠藜園做大廚，學習烹調專業中國菜。
老闆真傳雲吞雞煮法
楊太形容將家傳嘅雲吞雞秘制法傳畀Ricky係兵行險着，「因為傳畀本地廚師，怕其他餐廳容易挖角，Ricky佢幾聰明又肯學，決定傳畀佢」。
要外國人傳承傳統中國菜非易事，初次接觸中國料理，Ricky被多種陌生食材同極具份量嘅砂鍋考起，又試過誤食青胡椒令條脷麻痹。
被問到烹調雲吞雞嘅心得，Ricky形容菜式令佢大開眼界，學習到除咗調味，火喉控制亦係關鍵，佢每朝7點幾開始準備湯底，為咗控制火喉，烹調過程唔可以遠離廚房，確保雞肉鮮嫩。經過長達8個月訓練，Ricky深得楊太真傳，𠵱家每日要負責烹調接近20鍋雲吞雞。