里約奧運喺當地時間上周五開幕,平平實實嘅開幕禮算獲好評,但叫座力就一般,就算傳出賽會派咗好多免費飛,仲係大把吉位。講到吸引力,沙灘排球就唔憂冇人捧場,運動員健康性感、熱情四射,好似上周六首日男、女子分組賽就要排長龍入場,氣氛勁好。
除咗開幕禮,據講賽會仲派咗唔少冷門項目嘅門票,例如七欖同馬術,務求場面冇咁難睇。不過,沙排就唔同啦,呢個項目既係東道主巴西嘅強項,本身有唔少人支持,加上比賽悅目,難怪門票搶手。沙排比賽場館位於里約著名嘅Copacabana海灘,睇完沙排仲可以即刻衝出去游吓水,確係賞心樂事;上個月仲爆出有AV導演喺呢個場附近拍鹹片,喺沙地上春光無限。
捷克甜姐兒捱噓反輸
沙排場館可以容納12,000人,可惜又係管理問題,首日入場安檢速度好慢,令開賽嗰陣場外仲大排長龍,好彩頭兩場都係男子組賽事,戲肉稍後先上演。第一個高潮係巴西女子組合艾嘉花(Agatha Bednarczuk)夥拍芭芭拉(Barbara Seixas),對住捷克甜姐兒施露高娃(Marketa Slukova)同靴文洛娃(Barbora Hermannova)。施露高娃喺上屆奧運已經有份參賽兼備受注意,佢同新拍檔對住東道主對手有好開始,先贏一局21:19,但對手始終係上年世錦賽冠軍兼有主場球迷大聲打氣,所以後勁不繼反輸。施露高娃每次開波都俾觀眾噓爆,佢賽後話打咁耐沙排都未試過遇到咁嘅情況。
「美」女凌晨開波冇冷場
艾嘉花同芭芭拉係奪金熱門之一,不過掂唔掂仲要先問過美國。美國上屆包辦金、銀牌,當時奪金嘅姬莉華殊(Kerri Walsh Jennings)同屈居銀牌嘅露絲(April Ross)今次做拍檔,首場分組賽以2:0輕取澳洲嘅迪蘇娜(Mariafe Artacho del Solar)同娜亞(Nicole Laird),呢場波到當地時間凌晨先開波,依然大把人捧場。其他養眼球員仲有瑞士嘅維姬迪比(Anouk Verge-Depre),不過佢喺首戰拍住科娜(Isabelle Forrer),就輸咗畀中國組合王凡/岳園。